Login
3. febrúar 2012
Stutt samantekt á pólsku - Raport z badań: streszczenie
Hér fyrir neðan er að finna stutta samantekt á rannsóknarskýrslu MIRRA á rannsókninni Pólónía Reykjavik 2010 og birtist á hér á heimasíðunni þann 7. desember s.l. Lengri útgáfa af rannsóknarskýrslunni á pólsku mun birtast síðar.
Między majem a sierpniem 2010 roku Centrum Badań Migracji przy Akademii Reykjavik (MIRRA/CIRRA) przeprowadziło ankietę wśród polskich migrantów zamieszkałych w Reykjaviku i okolicach. Badanie było częścią większego projektu „Migracje i Mobilność: Wyzwania Metodologiczne" koordynowanego przez Ośrodek Badań nad Migracjami Uniwersytetu Warszawskiego a finansowanego z Norweskiego Funduszu EOG. Głównym intencją/założeniem/celem projektu była ewaluacja metodologii badań ilościowych wśród populacji. W badaniu w Reykjaviku zastosowano nowatorska metodę zwaną Respondent Driven Sampling (RDS). Przy okazji projektu zebrano też wiele informacji na temat warunków życia i pracy polskich emigrantów. Wstępne wyniki przeprowadzonej ankiety prezentuje niniejszy raport.
W badaniu wzięło udział 480 respondent - 55% mężczyzn i 45% kobiet. Ponad połowa nie przekroczyła wieku 35 lat. Większość osób przyjechła do Islandii po tym jak kraj ten otworzył swój rynek gospodarczy dla nowych człownków UE, czyli między 2006 rokiem a 2008. Był to też okres intensywnego rozwoju islandzkiej gospodarki, któremu towarzyszł boom w sketorze budowlanym. Co ciekawe,15% uczestników badania przyjechało po rozpoczęciu kryzysu gospodarczego na wyspie. Z badania wynika, że migracja Polaków do Islandii miała przede wszystkim charakter eknomiczny. Większość respodentów odpowiedziła, że przyjechała do Islandii w poszukiwaniu pracy.
Ponadto, raport zawiera przegląd dostępnych baz danych, gdzie można uzyskać informacje na temat obcokrajowców, jak również ewalujacje reprezentatywności próby.
19. janúar 2012
MIRRA uppfærir þekkingarbankann
MIRRA hefur nú lokið uppfærslu á þekkingarbanka sínum. Þar er að finna upplýsingar um rannsóknir á málefnum innflytjenda og á íslensku fjölmenningarsamfélagi, sem hafa verið unnar á Íslandi, eða unnar af Íslendingum við erlendar rannsóknarstofnanir, svo og hvers konar rit og skýrslur um þennan málaflokk. Ritin ná aftur til ársins 1987 og fram til ársloka 2011. Þekkingarbanki MIRRU er einn sinnar tegundar í landinu þar sem hægt er að nálgast á einum stað öll rannsóknarrit sem fjalla um málefni innflytjenda, flóttafólk og hælisleitendur sem tengjast Íslandi á einn eða annann hátt. Í leit að heimildum er hægt að styðjast við yfir 500 leitarorð. Hér má nálgast þekkingarbankann.
7. desember 2011
Meira um Pólverja: Polonia Reykjavik 2010
Fyrstu niðurstöður úr rannsókn MIRRA Polonia Reykjavik 2010 eru birtar á ensku í þessari rannsóknarskýrslu. Þetta eru aðeins fyrstu niðurstöður. Unnið er að frekari úrvinnslu gagna og mun afraksturinn birstast á heimasíðunni þegar þar að kemur.
24.nóvember 2011
Það eru þessir Pólverjar - erindi flutt á Þjóðarspegli
Þann 28. október s.l. flutti Hallfríður Þórarinsdóttir forstöðumaður MIRRA erindi á Þjóðarspegli 2011 - Rannsóknir í félagsvísindum Háskóla Íslands. Í erindinu sem kallast Það eru þessir Pólverjar er að finna fyrstu niðurstöður úr viðtalsrannsókninni Pólónía - Reykjavík 2010, sem MIRRA lauk við fyrr á þessu ári. Greinina má finna í Rannsóknir í Félagsvísindum XII.
9.nóvember 2011
Ráðherra leggur áherslu á mikilvægi rannsókna -
rannsóknir MIRRA vekja athygli
„Hvaða fólk er þetta, hvers vegna kom það hingað og hvað er það að gera? Hver er bakgrunnur þess, hvernig er kynjaskiptingin, aldurssamsetningin, búsetudreifingin, hver er líðan fólksins hér á landi, hverjar eru væntingar þess og hvernig er þeim mætt? Allt þetta og svo margt fleira er mikilvægt að vita og vinna með ef við viljum búa í fjölmenningarsamfélagi sem stendur undir nafni".
Þetta sagði velferðarráðherra Guðbjartur Hannesson og lagði áherslu á mikilvægi rannsókna í þessu sambandi. Þessi orð ráðherra eru hluti af ræðu sem hann hélt á fjölmenningarráðstefnu sem bar yfirskriftina Brjótum múra og var haldin 4. og 5. nóvember s.l. á Akranesi. MIRRA er stolt af því að ráðherra vitnaði í ræðu sinni í fjórar rannsóknir og þar af tvær sem MIRRA gerði. Hér má lesa alla ræðu ráðherra.
Þess má geta að ráðstefnan Brjótum múra var fjölsótt og MIRRA sendi sinn fulltrúa þangað. Að baki ráðstefnunni stóðu Rauði krossinn á Akranesi, Akraneskaupstaður auk annara en ráðstefnan er liður í samnefndu verkefni sem styrkt er af Progress áætlun Evrópusambandsins.
3. nóvember 2011
Fyrsta innflytjendakonan tekur sæti á Alþingi
Þau gleðitíðindi bárust frá Alþingi að í dag hefði fyrsta konan úr hópi innflytjenda tekið sæti á Alþingi það er Amal Tamimi Samfylkingu, sem tekur sæti Lúðvígs Geirssonar. Amal hefur búið á Íslandi í sextán ár og hefur unnið í fjölda ára að málefnum innflytjenda og starfar nú sem forstöðumaður Jafnréttisstofu í Hafnarfirði. MIRRA óskar Amal Tamimi til hamingju með þennan glæsilega árangur og öllum öðrum í landinu til hamingju með þennan merka áfanga í sögu landsins. Hér má sjá fréttina í Morgunblaðinu
27. október 2011
Margt sem kemur á óvart með pólska innflytjendur
Hátt menntunarstig meðal Pólverja og yfirgnæfandi meirihluti þeirra í sambúð eða hjónabandi er meðal þess sem rannsókn MIRRA á Pólverjum á höfuðborgarsvæðinu, Pólónía Reykjavík 2010 hefur leitt í ljós. Hallfríður Þórarinsdóttir forstöðumaður MIRRA kynnir fyrstu niðurstöður rannsóknarinnar í erindi sínu Það eru þessir Pólverjar. Erindið verður flutt á Þjóðarspegli XII - rannsóknir í félagsvísindum Háskóla Íslands - sem verður í HÍ á morgun föstudag 28. október. Af því tilefni ræddi Síðdegisútvarp Rásar 2 við Hallfríði. Hlusta
26.október 2011
Ósáttur við fordóma í garð innflytjenda á Íslandi
Á dögunum birtist í vikublaðinu Grapevine opið bréf frá Paul Fontaine (áður þekktur sem Paul Nikolov) til Jakobs Frímanns Magnússonar miðborgarstjóra vegna óviðurkvæmilegra ummæla hans í garð Búlgara og Rúmena á Íslandi. Paul er afar ósáttur við þá mynd sem Jakob Frímann dregur upp og krefst þess að hann biðjist afsökunar á ummælum sínum. Hér má lesa skrif Paul Fontane
12. ágúst 2011
Lítil pólitísk vigt - umræðan skammt á veg komin
Hryðjuverkin sem framin voru í Noregi fyrir skemmstu voru drifin áfram í krafti útlendingahaturs og andstöðu við innflytjendur. Óeirðirnar sem farið hafa sem eldur í sinu um stórborgir í Bretlandi undanfarna daga eiga sér m.a. rætur í frústrasjón og vonleysi meðal innflytjenda og annara sem finna sig í veikri félags- og efnahagslegri stöðu í samfélaginu.
Fréttablaðið ræddi við Hallfríði Þórarinsdóttur forstöðmann MIRRA um málefni innflytjenda, meðal annars í tengslum við atburðina í Noregi og Bretlandi. Greinina má lesa hér.
20. maí 2011
Hverjir eru þeir eiginlega þessir Pólverjar?
MIRRA heldur kynningu á viðtalsrannsókn sinni Mobility and Migrations at the Time of Transformation - Methodological Challenges (Hreyfing og búferlaflutningar á umbreytingatímum - aðferðafræðilegar áskoranir).
Kynningin verður haldin næstkomandi þriðjudag þann 24. maí í fyrirlestrarsal Þjóðminjasafns Íslands v/Suðurgötu og stendur frá kl. 14 - 16.
Rannsóknin sem hlaut veglegan styrk frá frá Þróunarsjóði EFTA er samvinnuverkefni þriggja landa, Íslands undir forystu MIRRA, Póllands undir forystu Center of Migration Research (CMR) við Varsjárháskóla og Noregs undir forystu Fafo - Institute for Applied International Studies í Osló. Um er að ræða könnun á tölfræðlegum gögnum um alþjóðlega búferlaflutninga til og frá Póllandi þar með talin tölfræði frá móttökulöndum. Markmið rannsóknarinnar var að fá úr því skorið hvort þessi tiltekna aðferðafræði endurspegli skráningar um opinber gögn eða leiði eitthvað annað í ljós. Til að afla þessara gagna voru tekin viðtöl við tæplega 500 Pólverja sem búsettir eru á höfuðborgarsvæðinu. Viðtölin fóru fram 2010.
Sagt verður frá framkvæmd rannsóknarinnar, aðferðafræðinni (Respondent Driven Sample), auk þess á hvaða hátt rannsóknargögn stemma við opinberar tölur Hagstofu Íslands og fleiri stofnana. Ennfremur verður gefin innsýn inn í þann þekkingarbanka sem gögnin fela í sér og tæpt á helstu einkennum hópsins m.t.t menntunar, atvinnuþátttöku og viðhorfa til búsetu á Íslandi ásamt fleiru.
Að lokinni kynningu verður opnað fyrir spurningar og umræður í sal.
Staður: Fyrirlestrarsalur Þjóðminjasafns Íslands
Stund: Þriðjudagur 24.maí kl. 14-16
Aðgangur er öllum opinn.
28.mars 2011
Eftirfarandi frétt birtist í Fréttablaðinu mánudaginn 28. mars:
Atvinnuleysið mælist mest meðal erlendra ríkisborgara
Nær 20 prósenta atvinnuleysi er á meðal Pólverja á Íslandi. Árið 2006 voru 13 Pólverjar atvinnulausir en 1.428 í síðasta mánuði. Hópur útlendinga framfleytir fjölskyldu í heimalandinu á bótum. Heima eru þeir réttlausir .
atvinnumál Atvinnuleysi meðal útlendinga er töluvert meira en meðal Íslendinga.
Atvinnumál
Atvinnuleysi meðal útlendinga er töluvert meira en meðal Íslendinga. Á sama tíma komast margir ekki til heimalands síns þar sem þeir eru réttlausir, og velja frekar að dvelja á Íslandi á bótum.
Árið 2007 var atvinnuleysi á meðal útlendinga lægra en Íslendinga. Þegar atvinnuleysiðnáði hæstu hæðum í mars og apríl 2009 var það fjórtán prósent meðal útlendinga en níu prósent á meðal Íslendinga. Út frá áætlun VMST um fjölda á vinnumarkaði er það nú um 13,5 prósent, en rúm sex prósent meðal Íslendinga. Árið 2007 voru tuttugu þúsund útlendingar á vinnumarkaði. Tæpur helmingur þeirra var Pólverjar. Árið 2006 voru þrettán Pólverjar á atvinnuleysisskrá en í lok febrúar síðastliðnum voru alls 2.375 erlendir ríkisborgarar án atvinnu, þar af 1.428. Pólverjar, eða 61 prósent þeirra útlendinga sem þá voru á skrá. Af Pólverjum eingöngu var atvinnuleysið 19,5 prósent að meðaltali árið 2010.
Gerður Gestsdóttir, ráðgjafi hjá VMST og áður Alþjóðahúsi, segir það sorglegt hversu margir útlendingar komast ekki heim. "Ef þeir færu hefðu þeir enga framfærslu. Það er því illskárra að hanga hér á bótum, vonlítill um að fá vinnu og við ömurlegar félagslegar aðstæður, en að fara heim og fá ekki neitt." Félagsvísindastofnun komst að því í janúar að tæpur helmingur allra þeirra sem þáðu mataraðstoð hjá hjálparsamtökum í nóvember voru Pólverjar. Þeir voru nær allir atvinnulausir, eða níu af hverjum tíu.
- sjá / sjá síðu 12 hér
16. mars 2011
Innflytjendamál í Návígi
Í gærkvöldi var þátturinn Návígi, sem er á dagskrá Ríkissjónvarpsins, helgaður innflytjendamálum. Þar ræddi Þórhallur Gunnarsson við innflytjendur sem búsettir hafa verið á Íslandi í fjölda ára auk konu sem er fædd og uppalin á Íslandi en er af blönduðum uppruna. Sögðu þau m.a. frá reynslu sinni af fordómum og mismunun. Hallfríður Þórarinsdóttir forstöðumaður MIRRA ræddi þar líka viðhorf íslenskra stjórnvalda og almennings í landinu til innflytjenda og velti við ýmsum steinum. Hér má nálgast þáttinn.
!5. mars 2011
Hvað eru margir innflytjendur á Íslandi?
Samkvæmt nýjustu tölum sem Hagstofa Íslands birtir í dag þá hefur innflytjendum í fyrstu kynslóð fækkað örlítið á milli ára en þeim hefur hins vegar fjölgað í annari kynslóð. Einnig vekur athygli hversu mikil fækkun er á milli ára hvað varðar fjölda þeirra sem fengu íslenskt ríkisfang. Á árinu 2010 fengu eingunigs 450 erlendir einstaklingar íslenskt ríkisfang en voru 728 árið 2009. Ekki liggur ljóst fyrir af hverju þessi fækkun stafar. Sjá nánar frétt frá Hagstofu hér.
15.mars 2011
MIRRA á öldum ljósvakans
Þátturinn Víðsjá á Rás 1 bað Hallfríði Þórarinsdóttur forstöðumann MIRRA að koma í spjall þann 8. mars til að segja frá fyrirlestri sínum um viðtalsrannsókn MIRRA meðal Pólverja á höfuðborgarsvæðinu (sem sagt var frá hér á síðunni) hér má heyra viðtalið.
Nokkrum dögum síðar, var Hallfríður beðinn um að mæta í þáttinn Sprengisand á Bylgjunni til að segja frá sömu rannsókn og mætti hún þar í beina útsendingu sunnudaginn 13. mars. Hér má heyra viðtal Sigurjóns Egilssonar við Hallfríði.
8. mars 2011
Hvað segja Pólverjar um Ísland og Íslendinga?
Hvers vegna völdu þeir Ísland?
Í kvöld þann 8. mars kl. 20:00 mun dr. Hallfríður Þórarinsdóttir forstöðumaður MIRRA flytja fyrirlestur á vegum Mannfræðifélags Íslands í ReykjavíkurAkademíunni. Í erindinu verða kynntar niðurstöður úr viðtalskönnun við tæplega 500 Pólverja búsetta á höfuðborgarsvæðinu. Þátttakendur voru m.a. inntir eftir reynslu sinni af íslenskum vinnumarkaði, réttindum og skyldum, menntun og nýtingu hennar, samskiptum við Íslendinga í og utan vinnu ásamt mörgu fleiru. Viðtölin voru tekin frá maí til ágúst 2010 Rannsóknin er hluti af alþjóðlegu samstarfsverkefni sem MIRRA vinnur með Varsjárháskóla og rannsóknarstofnuninni Fafo í Osló í Noregi.
4. febrúar 2011
Styrkur frá norrænu ráðherranefndinni
Gleðifréttir bárust frá Osló á dögunum þegar MIRRA fékk að vita að norræna ráðherranefndin hefði ákveðið að styrkja samnorrænt verkefni sem MIRRA tekur þátt í. Styrkurinn er um fjórar og hálf milljón danskra króna, sem deilist milli þáttakenda. Um er að ræða rannsókn sem ber heitið Labor migrants from Central and Eastern Europe in the Nordic countries: Patterns of migration, working conditions and recruitment practices - á íslensku mætti þýða þetta: vinnuafl á Norðurlöndum frá mið og austur Evrópu: mynstur í búferlaflutningum, vinnuaðstæður og starfshættir við ráðningar. Auk Íslands taka þrjú önnur Norðurlönd og Pólland þátt í rannsókninni. Þetta eru: Fafo í Osló, stofnun sem helgar sig félags- og vinnumarkaðsrannsóknum, FAOS miðstöð í vinnumarkaðsrannsóknum í Kaupmannahöfn, SOFI stofnun í félagsvísindarannsóknum í Stokkhólmi og svo CMR við Varsjárháskóla, stofnun sem rannsakar alþjóðlega búferlaflutninga.
Markmið rannsóknarinnar er að öðlast þekkingu á búferlaflutningum starfsmanna frá mið- og austur Evrópu til Norðurlandanna og kanna þá þætti sem móta vinnuaðstæður og vinnuumhverfi þeirra í þessum löndum, þar með talið umfang og eðli félagslegra undirboða og ekki síst sérstakt hlutverk ráðningaragenta við upphaf flutninga inn á norrænan vinnumarkað. Með því að greina hvernig hin ólíku vinnumarkaðskerfi og kjarasamningar sem og mismunur á efnahags og samfélagsgerð milli landa hefur áhrif á stöðu þessara erlendu starfsmanna á vinnumarkaði þá leitast rannsóknin við að þróa nýja þekkingu sem hægt er að nota til að sameina áherslur á öryggi og jafnræði í alþjóðlegum búferlaflutningum vinnandi fólks auk þess að tryggja sjálfbærni hins norræna veleferðarkerfis í tengslum við sívaxandi hnattvæðingu.
Rannsókninni verður stýrt af Fafo í Osló. Fyrirhugað er að þáttakendur hittist á vinnufundi í Osló um miðjan maí og leggi þar frekari drög að skipulagi rannsóknarinnar.
11. janúar 2011
Réttur þinn - Nýtt upplýsingarit fyrir erlendar konur á Íslandi
Efni bæklingsins og útgáfa hans er styrkt af Progress-áætlun Evrópusambandsins og Þróunarsjóði innflytjendamála og unnin í samstarfi við Stígamót og Mannréttindaskrifstofu Íslands ásamt fleiri stofnunum og félagsasamtökum til þess að tryggja að allar þær upplýsingar sem þörf er á séu til staðar í bæklingnum.
Bæklingurinn er bæði prentaður og gefinn út rafrænt til þess að auðvelda útbreiðslu og aðgengi. Sjá:
http://www.jafnretti.is/jafnretti/?D10cID=ReadDocument&ID=123&DocCatID=12
6. janúar 2011
Fyrsti innflytjandinn kosinn íþróttamaður ársins
Í gær var handknattleiksmaðurinn Alexander Petersson kosinn íþróttamaður ársins 2010. Kjörið markar tímamót í íþróttasögu Íslands því þetta er í fyrsta skipti sem innflytjandi hlýtur nafnbótina. Alexander er fæddur í Lettlandi árið 1980 og hefur verið íslenskur ríkisborgari frá því 2004. „Þetta er bara frábært og kom mjög mikið á óvart. Ég bjóst alls ekki við þessu. Ég er enn að átta mig á þessu og því að allir séu að óska mér til hamingju með að vera íþróttamaður ársins. Þetta er stórkostleg stund í mínu íþróttalífi," sagði Alexander í viðtali við visir.is. MIRRA óskar Alexander Petersson til hamingju með titilinn.
Sjá nánar á: http://visir.is/storkostleg-stund-i-minu-ithrottalifi/article/2011373393910
Viðtölum í rannsókn lokið
9. september 2010
MIRRA lauk fyrir skemmstu viðtölum við tæplega 500 Pólverja sem búsettir eru á höfuðborgarsvæðinu. Viðtölin eru kjarninn í alþjóðlegri rannsókn sem MIRRA vinnur að ásamt Varsjárháskóla og rannsóknarstofnuninni Fafo í Oslo. Rannsóknin heitir Mobility and Migrations at the Time of Transformation - Methodological Challenges - Hreyfing og búferlaflutningar á umbreytingatímum - aðferðafræðilegar áskoranir. Fyrstu viðtöl voru tekin í lok maí og þau síðustu um miðjan ágúst. Líkt og komið hefur fram hér á síðunni þá var aðferðafræðin sem stuðst var við s.k. snjóboltaaðferð. Viðföng fengu greitt fyrir viðtalið og máttu útvega tvo aðra þátttakendur og fengu sérstaklega greitt fyrir það líka. Viðtölin voru öll tekin í húsnæði MIRRA og þurftu þáttakendur að panta sér tíma. Rannsóknin fór hægt af stað en síðan fór þátttakendum fjölgandi dag frá degi og voru tekin um 20 viðtöl á dag þegar mest var og endurómaði pólska um allt. Innslætti gagna er ennfremur lokið en framundan er geysileg vinna sem lýtur að úrvinnslu gagnanna.
7. júní 2010
MIRRA rannsakar Pólverja á Íslandi
MIRRA hóf á dögunum könnun á búferlaflutningum Pólverja til Íslands að lokinni langri undirbúningsvinnu. Um er að ræða afar spennandi alþjóðlegt verkefni. Eins og flestir vita eru Pólverjar langsamlega fjölmennasti innflytjendahópurinn á Íslandi. Í janúar s.l. voru pólskir ríkisborgarar um 46% allra erlendra ríkisborgara á Íslandi sem jafngildir um tíu þúsund manns. Ætla má að Pólverjar séu í raun fleiri þegar tekið er tillit til þeirra sem hlotið hafa íslenskt ríkisfang.
Rannsóknin sem hlaut veglegan styrk frá frá Þróunarsjóði EFTA ber heitið Mobility and Migrations at the Time of Transformation - Methodological Challenges (Hreyfing og búferlaflutningar á umbreytingatímum - aðferðafræðilegar áskoranir). Rannsóknin er samvinnuverkefni þriggja landa, Íslands undir forystu MIRRA, Póllands undir forystu Center of Migration Research (CMR) við Varsjárháskóla og Noregs undir forystu Fafo - Institute for Applied International Studies í Osló. Um er að ræða könnun á tölfræðlegum gögnum um alþjóðlega búferlaflutninga til og frá Póllandi þar með talin tölfræði frá móttökulöndum. Markmiðið er að fá úr því skorið hvort þessi tiltekna aðferðafræði endurspegli skráningar um opinber gögn eða leiði eitthvað annað í ljós. Til að afla þessara gagna eru tekin viðtöl og er áætlað að talað verði við 500 Pólverja sem búsettir eru á höfuðborgarsvæðinu, konur og karla sem komin eru yfir átján ára aldur. Þegar þetta er skrifað í byrjun júní er rúmum 50 viðtölum lokið. Könnunin byggir á aðferðafræði sem kallast á ensku „correspondent driven sample" sem er einskonar „snjóboltaaðferð", sem felst í því að upphaflega eru valin nokkur viðföng og þau beðin um að útvega tvö ný hvert fyrir sig og svo koll af kolli. Viðföng fá greitt fyrir þátttöku. Viðtölin, sem taka um eina klukkustund að jafnaði fara öll fram á pólsku og hefur MIRRA ráðið til sín sjö pólskumælandi spyrla til að sinna því. Umsjón með viðtölum hefur Anna Wojtynska, doktorsnemi í mannfræði við Háskóla Íslands. Anna hefur unnið að undirbúningi rannsóknarinnar frá upphafi. Ábyrgðarmaður rannsóknar á Íslandi er dr. Hallfríður Þórarinsdóttir forstöðumaður MIRRA. Áætlað er að viðtölum ljúki um mánaðarmótin júlí-ágúst en að endanlegri úrvinnslu gagna ljúki á næsta ári. MIRRA hefur í hyggju að sækja um fleiri styrki til frekari úrvinnslu gagna þar sem núverandi styrkur er aðeins fyrir hluta úrvinnslunnar.
Rannsókninni er stýrt frá Varsjá og verkefnisstjóri er Paweł Kaczmarczyk sem er dósent í hagfræði við Varsjárháskóla. Hér má sjá finna frekari lýsingu á rannsókninni. http://www.migracje.uw.edu.pl/projekt/120/
4. júní 2010
Hvað er nýtt í innflytjendaumræðunni á Norðurlöndunum?
Mirra vekur athygli á að umræða um innflytjendur er ofarlega á baugi á Norðurlöndum. Þetta má sjá á http://www.norden.org/ sem er vefsíða um opinbert norrænt samstarf. Þátturinn Analys Norden fjallar að þessu sinni um innflytjendaumræðuna og pólitískar afleiðingar hennar í norrænu ríkjunum.
Finnland
Gagnrýni á stefnu í innflytjendamálum og lýðskrum fær byr undir báða vængi
Áherslur í stjórnmálaumræðum í Finnlandi hafa breyst á skömmum tíma. Gagnrýni á málefni innflytjenda hefur færst frá jaðri stjórnmálanna yfir í að vera eitt vinsælasta umræðuefni almennings og útlit er fyrir að lýðskrum njóti aukinna vinsælda. Í fjármálakreppunni verður vart við aukna andúð Finna gagnvart innflytjendum. Nú er svo komið að hluti samræðnanna fer fram utan þess ramma sem leyfilegur er samkvæmt lögum.
Noregur
Frá hægralýðskrumi til þjóðernislýðskrums
Skoðanakannanir benda til hægribylgju í Noregi, en það er hinn tiltölulega hófsami Hægriflokkur sem hefur styrkt sig. Róttæki hægriflokkurinn Framfaraflokkurinn berst við að halda fylgi sínu meðal allra þeirra sem kusu hann í fyrra en aldrei hafa fleiri stutt hann en þá. Það er hugsanlega vegna þess að Verkamannnaflokknum hefur tekist að koma strangari stefnu í málefnum flóttamanna í gegnum rauð-grænu ríkisstjórnina og af því að sífellt fleiri á vinstrivæng stjórnmálanna mæla fyrir minna umburðalyndri stefnu í málefnum innflytjenda.
Svíþjóð
Afstaða Svía gagnvart innflytjendum jákvæðari
Viðhorf til þess að taka á móti innflytjendum til Svíþjóðar batnar. Það er aðeins Sænski lýðræðisflokkurinn, Sverigedemokraterna, sem hefur greinilega andúð á innflytjendum og flóttamönnum. Flokkur sem aldrei hefur komist nálægt því að ná inn fulltrúum á sænska þjóðþingið. Og líkurnar á að það gerist minnka enn, nú á vordögum kosningaársins 2010.
Danmörk
Danski þjóðarflokkurinn setur dagskipan
Endurreisnaráætlun sem ætlað er að styrkja danskt efnahagslíf á næstu árum inniheldur ýmis ákvæði sem að áliti gagnrýnenda beinast eindregið að innflytjendum. En gagnrýnin er veikburða því að Danski þjóðarflokkurinn hefur unnið baráttuna um stefnu í útlendinga- og samþættingarmálum.
Ísland
21. apríl 2010
Hvað hyggst þinn flokkur gera í málefnum innflytjenda?
Grand Hótel, föstudaginn 30. apríl kl. 8 - 10
Þátttakendur í pallborði:
Kjartan Magnússon fyrir Sjálfstæðisflokk
Oddný Sturludóttir fyrir Samfylkinguna
Sóley Tómasdóttir fyrir Vinstrihreyfinguna - grænt framboð
Einar Skúlason fyrir Framsóknarflokkinn
Ávarp fyrir hönd Teymis um málefni innflytjenda: Kristín Vilhjálmsdóttir, Borgarbókasafni
Fundarstjóri: Margrét Steinarsdóttir, framkvæmdastjóri Mannréttindaskrifstofu Íslands*
Dagskrá fundarins er eftirfarandi:
Fulltrúi teymisins setur fundinn
Fulltrúar framboða til borgarstjórnar halda stutt erindi þar sem þeir munu svara eftirfarandi spurningum:
Hvernig ætlar þitt framboð að fylgja eftir mannréttindastefnu Reykjavíkurborgar í málefnum innflytjenda?
Hvaða verkefni eru brýnust í því samhengi og hvers vegna?
Hvernig viljið þið sjá þjónustu við innflytjendur og fjölskyldur þeirra í framtíðinni?
Að erindum loknum verða spurningar úr sal. Notum tækifærið til að koma málefnum innflytjenda á dagskrá kosninganna í vor!
Teymi um málefni innflytjenda er samráðsvettvangur stofnana ríkis og sveitarfélaga, fyrirtækja og frjálsra félagasamtaka sem vinna að málefnum innflytjenda og hafa starfað síðan 1995.
Vinsamlega skráið þátttöku í fundinum í netfangi teymid@gmail.com eða hjá Gerði í síma 8230767.
Morgunverðurinn kostar 1.850 kr. og er það aðgangseyririnn.
* Frá árinu 1995 hafa fulltrúar stofnana, fyrirtækja, frjálsra félagasamtaka, háskólasamfélagsins, ríkis og sveitarfélaga hist óformlega og rætt stöðu innflytjenda hér á landi. Teymið hefur hingað til fyrst og fremst verið vettvangur samráðs og upplýsinga en nú er markmiðið að útvíkka hlutverk teymisins. Með fjölgun innflytjenda hefur fulltrúum í teyminu fjölgað og eru núna tæplega 30. Fundað er mánaðarlega yfir vetrartímann.
9.febrúar 2010
Rannsóknarskýrsla komin út
Staða innflytjenda á erfiðleikatímum - raddir og viðhorf, rannsókn sem MIRRA vann á s.l. ári í samvinnu við Rauða kross Íslands er komin út.
Rannsóknin kannaði áhrif yfirstandandi efnahagskreppu á innflytjendur á, upplifun og reynslu þeirra af búsetu á Íslandi fyrir og eftir hrun. Meðal annars var skoðað hvort innflytjendur yrðu frekar fyrir fordómum og mismunun en innfæddir á slíkum tímum, hvort munur væri á milli landshluta eða á milli etnískra hópa.
Rannsóknin er tvíþætt. Annars vegar er um að ræða eigindlega rannsókn með þátttöku s.k. rýnihópa auk viðtala. Rýnihópaumræður fóru fram víðsvegar um landið og tóku alls 57 einstaklingar þátt frá 25 löndum. Þátttakendur svöruðu jafnframt nafnlausum spurningalista (íslensku, ensku, pólsku) með 40 spurningum sem vörðuðu grunnþætti á borð við kyn, aldur, upprunaland, lengd búsetu ásamt fleiru. Ennfremur voru tekin viðtöl við starfsmenn Rauða kross Íslands á hverjum stað auk fjölda annara sem starfa að málefnum innflytjenda.
Hins vegar, laut rannsóknin að greiningu og úrvinnslu gagna um fólksfjöldaþróun á landinu í heild og í einstökum landshlutum m.t.t., innflytjenda, búsetu- og atvinnuþróunar. M.a. var unnið úr opinberum gögnum um atvinnumál/atvinnuleysi frá Vinnumálastofnun auk lýðfræðilegra gagna frá Hagstofu Íslands og Byggðastofnun. Rannsóknin krafðist og öflunar sögulegra heimilda um viðveru og búsetu innflytjenda í hverjum landshluta. Ennfremur var stuðst við margskonar skýrslur og greinar innlendar og erlendar sem fjalla um málefni innflytjenda auk þróunar búsetu og atvinnuhátta og áhrifa þeirra á alþjóðlega búferlaflutninga.
15. janúar 2010
Bjartar horfur hjá MIRRA fyrir árið 2010
Það er gleðilegt að segja frá því að rekstur MIRRA hefur verið tryggður fyrir 2010 með framlagi fjárlaganefndar Alþingis, sem staðfest var með samþykkt fjárlaga þann 22. desember s.l. Fjárframlag þetta skiptir algerlega sköpum fyrir rekstur rannsóknarmiðstöðvarinnar og gerir henni kleift að halda ótrauðri áfram.
Undirbúningur og skipulagning rannsóknar sem ber heitið Migrations and Mobility in Times of Transformations - Methodological Challenge eru komin á fullt skrið. Rannsóknin hlaut styrk frá Þróunarsjóði EFTA og er samstarfsverkefni MIRRA, Varsjárháskóla og norsku rannsóknarstofnunarinnar Fafo í Osló. Umsókn um styrk var send inn árið 2007 og svar barst um mitt ár 2008 að styrkur hefði verið veittur. Það var þó ekki fyrr en um mitt ár 2009 sem hægt var að hefja eiginlegan undirbúning sem nú er langt á veg kominn og sóttu forstöðumaður og starfsmaður MIRRA tvo undirbúningsfundi á síðasta ári, sem báðir voru haldnir í Varsjá ,sá síðari um miðjan desember s.l.
Markmið rannsóknarinnar er fyrst og fremst að kanna gildi tiltekinnar aðferðar og hvort hún endurspeglar opinber gögn í viðkomandi þátttökulöndum um alþjóðlega búferlaflutninga Pólverja. Til að meta þessa aðferðafræði á Íslandi verður gerð könnun meðal 600 Pólverja á höfuðborgarsvæðinu og lagðir fyrir þá spurningalistar sem spanna mjög vítt svið m.a., ástæður búferlaflutinga, atvinnu auk ýmissa bakgrunnsupplýsinga. Miðað er við að könnunin á Íslandi fari fram á vormánuðum að lokinni hliðstæðri könnun í Osló. Starfsmaður MIRRA heldur til Oslóar innan fárra daga þar sem hann fær tækifæri til að fylgjast með gangi mála og öðlast þjálfun áður en hafist verður handa hér á landi.
25. september 2009
MIRRA í Samfélaginu í nærmynd á Rás 1
MIRRA mætti í viðtal í Samfélagið í nærmynd á Rás 1, miðvikudaginn 23. september. Viðtalið má nálgast hér. Athugið að ef ekki er ætlunin að hlusta á allan þáttinn verður að spóla áfram og viðtalið er í síðari hluta þáttarins.
24. september 2009
Hægt að lesa rannsókn MIRRA
Nú er hægt að lesa Staða innflytjenda á erfiðleikatímum - raddir og viðhorf á vefsíðu MIRRA Rannsóknarskýrslan verður gefin út í bók innan skamms. Þeir sem áhuga hafa á að kaupa eintak eru vinsamlegast beðnir um að senda póst á: mirra@mirra.is. Endanlegt verð er ekki komið en því verður stillt í hóf.
23. september 2009
Raddir innflytjenda heyrast ekki nógu vel - fleiri rannsókna þörf
Fram kom að töluvert stór hópur þátttakenda hafði reynslu af bágbornu efnahagsástandi úr heimalandi sínu. Eða eins og segir í rannsóknarskýrslunni:
Margir þátttakendur höfðu ekkert nema góða reynslu af vinnumarkaði og nefndu bæði samstarfsfólk, stéttarfélög og vinnuveitendur í því sambandi. Aðrir höfðu miður góða reynslu þar sem þeim hafði verið stórlega mismunað í launum og verið afskiptir félagslega. Mismunandi reynsla var af fordómum og mismunun í þeirra garð af hálfu heimamanna en ljóst var að slík viðhorf og hegðun höfðu hvorki aukist né minnkað eftir kreppu.
Hallfríður benti á að rannsóknin hefði ekki náð til þess hóps innflytjenda á Íslandi sem er í hvað viðkvæmastri stöðu, en þetta er fólk sem kemur frá löndum utan Evrópusambandsins og er búið að missa vinnuna. Fólk utan ESB er háð tímabundnu dvalarleyfi sem gefið er út til árs í senn og grundvallast á því að sýna fram á örugga framfærslu. Hafi viðkomandi misst vinnu og eigi ekki maka sem getur framfleytt þeim fæst dvalarleyfið ekki endurnýjað. Þessir einstaklingar eiga lögum samkvæmt ekki rétt á atvinnuleysibótum. Þiggi þeir félagslega aðstoð fyrirgera þeir rétti sínum á að geta sótt um íslenskan ríkisborgararétt næstu þrjú árin. Þessir einstaklingar eru í sérlega veikri stöðu og hætt við að þeir verði ósýnilegir. Það er ákaflega erfitt að fá fólk sem komið er í jafnviðkvæma stöðu og þessir einstaklingar eru, til að taka þátt í rannsóknum. Það kallar engu síður á að opinberir aðilar haldi árvekni sinni og að velferð þessa fólks verði ekki stefnt í hættu.
Í erindi Hallfríðar kom einnig fram að þrátt fyrir þá staðreynd að erlendir ríkisborgarar séu nú milli sjö og átta prósent af mannfjölda í landinu þá eru þeir jaðarhópur sem ekki hafa mikla pólitíska vigt. Áhugi stjórnmálamanna á þessum fjölmenna hópi hafi ekki verið mikill fram að kreppunni og lítið hafi borið á umræðu um stöðu þessa fólks eftir að kreppan skall á. Fólk sem er í minnihlutaaðstöðu er t.a.m líklegra til að verða fyrir mismunun á vinnustað og ólíklegra til að gera athugasemdir við slíkt sökum veikrar stöðu sinnar. Hætta er á að á samdráttartímum líkt og nú ganga yfir verði hópurinn ennþá meiri afgangsstærð en verið hefur. Undir þetta tóku aðrir frummælendur á þinginu sem fögnuðu rannsókninni en bentu ennfremur á að það kæmi vel fram í skýrslunni hversu mikil þörf er á frekari rannsóknum á sviði innflytjendamála.
22. september 2009
MIRRA á Morgunvakt Rásar 2
Forstöðumaður MIRRA Hallfríður Þórarinsdóttir mætti í morgun í viðtal á morgunútvarp Rásar 2 til skrafs um kynningu á rannsókninni Staða innflytjenda á erfiðleikatímum, á málþinginu Eru innflytjendur afgangsstærð? Viðtalið má nálgast hér:
Innflytjendur á Íslandi á krepputímum
17. september 2009
MIRRA kynnir rannsókn sína: Staða innflytjenda á erfiðleikatímum - raddir og viðhorf
Eru innflytjendur afgangsstærð? Svo nefnist málþing sem haldið verður n.k þriðjudag 22. september þar sem rannsókn MIRRA Staða innflytjenda á erfiðleikatímum - raddir og viðhorf, verður kynnt. Rannsóknin var unnin í samstarfi við Rauða kross Íslands og hófst í janúar s.l og lauk á sumardögum.
Í kjölfar bankahruns í byrjun október 2008 og efnahagskreppu sem fylgdi í kjölfarið vaknaði áhugi hjá MIRRA og Rauða krossi Íslands á að kanna líðan og stöðu innflytjenda á Íslandi. Þrátt fyrir ólíkan menningarlegan uppruna og stéttarstöðu eru innflytjendur minnihlutahópur, en þeir eiga oft í vök að verjast á viðsjárverðum tímum eins og í þeim efnahagsþrengingum sem íslenskt samfélag gengur nú í gegnum. Til að komast að því hver upplifun þeirra og reynsla væri í raun og veru var nauðsynlegt að heyra í þeim sjálfum. Rannsóknin byggir á rýnihópaviðtölum við innflytjendur víðsvegar um landið. Niðurstöður rannsóknarinnar verða kynntar þann 22. september n.k. á málþingi sem haldið verður í fyrirlestrarsal Þjóðminjasafns Íslands v/Suðurgötu frá 13:30 - 17:00. Á málþinginu verða ennfremur erindi þar sem frummælendur munu m.a. bregðast við niðurstöðum rannsóknarinnar. Málþinginu lýkur með pallborðsumræðum þar sem innflytjendur sitja fyrir svörum. Allir velkomnir.
Eru innflytjendur afgangsstærð?
Staða innflytjenda á erfiðleikatímum - raddir og viðhorf
Málþing haldið í Þjóðminjasafninu v/Suðurgötu - fyrirlestrarsal á jarðhæð
22. september kl. 13:30 - 17:00
Dagskrá:
13:30 – 13:45 „Hver á heima hvar?”
Kristján Sturluson, framkvæmdastjóri Rauða kross Íslands
13:45 – 14:20 Kynning á rannsókninni Staða innflytjenda á erfiðleikatímum - Hallfríður Þórarinsdóttir, forstöðumaður MIRRA - Miðstöðvar InnflytjendaRannsókna ReykjavíkurAkademíunni
14:20 – 14:35 Virk úrræði - Margrét Steinarsdóttir, framkvæmdastjóri Alþjóðahúss
14:35 – 14:50 Sýn sveitarfélaga á innflytjendamál - Halldór Halldórsson, formaður Sambands íslenskra sveitarfélaga
14:50 – 15:10 Kaffihlé
15:10 – 15:25 Verkefni með innflytjendum í Fjarðabyggð á Austurlandi - Sigríður Herdís Pálsdóttir verkefnisstjóri hjá Rauða krossi Íslands
15:25 – 15:40 Stefna Evrópusambandsins í innflytjendamálum - María Elvira Mendez Pinedo, lögfræðingur og prófessor við Háskóla Íslands
15:40 – Pallborð:
Paola Cardenas, verkefnisstjóri hjá Rauða krossi Íslands
Grazyna María Okuniewska, hjúkrunarfræðingur LSH,
Tatjana Latinovic, Intellectual Property Manager R&D Ossur Head Office
Halldór Nguyen, tölvunarfræðingur hjá Mími,
Akeem Richard, formaður Ísland Panorama Samtakanna
Fundarstjóri:
Sabine Leskopf, formaður Samtaka kvenna af erlendum uppruna og framkvæmdastjóri AUS
Allir velkomnir
29. júní 2009
Ný útgáfa af rannsóknaryfirliti
Ný uppfærsla af yfirliti MIRRA um rannsóknir og rit um innflytjendmál er komin á vefinn. Yfirlitið má finna undir liðnum ÞEKKINGARBANKI hér til vinstri.
Starfsfólk MIRRA kappkostar sem fyrr að bæta þjónustu við notendur þekkingarbankans á ýmsa lund. Auk þess sem nýjustu ritum hefur verið bætt í yfirlitið eru þar nokkrar nýjungar. Fremst í skjalinu er að finna ýmsar hagnýtar upplýsingar um innihaldið, þar á meðal er nú fullkominn listi yfir þær tegundir rita sem rannsóknaryfirlitið nær yfir. Einnig hafa nú verið skráð í stafrófsröð öll efnisorð sem koma fyrir í yfirlitinu, en þau eru alls 428 að tölu í þessari nýju uppfærslu. Þetta ætti að auðvelda þeim sem leita upplýsinga að gera sér grein fyrir hvort rannsóknaryfirlitið inniheldur efni sem leitað er að.
Til fróðleiks fylgja við hvert orð upplýsingar um hve oft það kemur fyrir í yfirlitinu. Ýmislegt fróðlegt kemur þar fram sem varpar ljósi á áherslur í skrifum um málefni innflytjenda á Íslandi. Lang algengasta efnisorðið er innflytjendur, sem kemur fyrir í 220 færslum. Þar næst koma fjölmenning (121 sinnum) og nýbúar (116 sinnum). Orðið kynþáttamismunun kemur aðeins fyrir einu sinni, kynþáttafordómar átta sinnum, mismunun þrisvar og rasismi tvisvar. Samþætting sést í fimm færslum, en orðið aðlögun 18 sinnum. Á óvart kemur að orðið karlar kemur aðeins fyrir einu sinni, en konur 25 sinnum.
Upplýsingar um 20 algengustu efnisorðin hafa verið settar í töflu, sem nálgast má hér .
Mikið atvinnuleysi meðal erlendra ríkisborgara
Miðvikudaginn 25. mars 2009 mátti lesa eftirfarandi í Morgunkorni Íslandsbanka:
"Alls voru tæplega 2.000 erlendir ríkisborgarar án atvinnu í lok febrúar sem nemur því að tæplega 13% allra sem voru skráðir atvinnulausir í lok síðasta mánaðar hafi verið erlendir ríkisborgarar. Um það bil 65% þeirra útlendinga sem voru skráðir atvinnulausir í lok febrúar voru Pólverjar. Alls störfuðu 778 þeirra útlendinga sem hafa misst vinnuna í byggingariðnaði eða um 40% þeirra sem misst hafa vinnuna. Þetta þarf varla að koma á óvart þegar höfð er í huga sú erfiða staða sem byggingariðnaðurinn er nú í vegna gjörbreyttra efnahagsaðstæðna. Atvinnuleysi hefur aukist hratt meðal útlendinga frá því að bankahrunið skall á í haust líkt enda aðstæður á vinnumarkaði nú gjörbreytt frá því sem áður var. Í lok september voru aðeins 122 útlendingar skráðir án atvinnu og hefur þeim því fjölgað um 1.830 síðan þá. Samkvæmt þessu er einn af hverjum fimm erlendum ríkisborgurum sem enn eru skráðir á vinnumarkað hér á landi atvinnulaus.
Samkvæmt mati Vinnumálastofnunnar eru nú um 10.000 erlendir ríkisborgarar á íslenskum vinnumarkaði og hefur þeim fækkað um 6.000 frá því að bankahrundið skall á síðastliðið haust. Vinnumálastofnun gerir ráð fyrir að í sumar hafi þeim enn fækkað og að þá verði eftir um 9.000 erlendir ríkisborgarar á íslenskum vinnumarkaði. Þetta er mikil viðsnúningur frá seinni hluta ársin 2007 því þegar mest var en talið er að þegar mest lét hafi um 20.þúsund erlendir ríkisborgarar verið á vinnumarkaði hér á landi eða sem nemur um það bil 10% af heildarvinnuafli.
Mikill sveigjanleiki vinnumarkaðarins
Líkt og koma útlendinganna hafði mikil áhrif á hagkerfið hefur skyndileg og hröð brottför þeirra ekki síður áhrif. Aðkoma þeirra í góðæri undanfarinna ára var til vitnis um sveigjanleika íslensk vinnumarkaðar. Aðkoma þeirra dró úr þenslu á vinnumarkaði og ljóst er að mannaflsfrekar aðgerðir síðustu ára á borð við Kárahnjúkavirkjun og fleira hefði ekki mátt vera án framlags erlendra ríkisborgara. Samspil margra mismunandi þátta á borð við mikla eftirspurn eftir vinnuafli, sterka krónu og aðild Íslands að Evrópska Efnahagssvæðinu og Shengen gerði Ísland að afar aðlagandi vinnumarkaði fyrir útlendinga. Núna gerir skyndileg brottför þeirra það að verkum að samdrátturinn í hagkerfinu kemur minna fram í atvinnuleysinu. Mikill sveigjanleiki vinnumarkaðarins kemur nú enn og aftur í ljós en ljóst er að í raun hafa miklu fleiri störf tapast hér á síðustu mánuðum en atvinnuleysistölur sýna þar sem einnig er um að ræða þau störf sem útlendingar sem hafa nú yfirgefið Ísland gegndu áður."
Sjá nánar á: http://www2.glitnir.is/Markadir/Greining/BirtaMorgunkorn.aspx?id=6228&queueid=3915
16. mars 2009
Erlendum ríkisborgurum fjölgar
Samkvæmt nýjustu tölum Hagstofu Íslands var fjöldi erlendra ríkisborgara búsettur á Íslandi þann 1 janúar s.l ríflega 24.000 manns og hafði fjölgað um tæplega eitt þúsund frá því á sama tíma í fyrra.
Sem fyrr þá eru Pólverjar langsamlega flestir, rétt um 11.000 og þar á eftir eru Litháar (1.670), Þjóðverjar (1.140) og Danir (951). Erlendir ríkisborgarar hafa aldrei verið fleiri búsettir hér á landi og kemur það ef til vill á óvart miðað við efnahagskreppu og atvinnuleysi. Ljóst er að töluverður hópur erlendra ríkisborgara hefur flutst af landi brott frá því í haust þó þess sjái ef till vill ekki enn merki í tölunum frá Hagstofunni þar sem oft er töf á því að þeir sem flytja úr landi séu felldir af íbúaskrá. Hvað sem því líður þá er engu að síður ljóst að fjöldi erlendra ríkisborgara og íslenskra ríkisborgara af erlendum uppruna hefur aldrei verið meiri.
11.mars 2009
MIRRA með í Hugmyndamarkaði Allra heimsins kvenna
Föstudaginn 6. mars s.l. stóð samstarfshópurinn Allar heimsins konur, fyrir s.k. Hugmyndamarkaði í gamla Miðbæjarbarnaskólanum við Tjörnina. Þar voru samankomnir fulltrúar ýmissa stofnana og félaga og kynntu starfsemi sína í málefnum innflytjenda. MIRRA var meðal þátttakenda og sagði frá rannsóknum sínum og annari starfssemi og sýndu gestir starfsseminni mikinn áhuga.
Aðrir fulltrúar fluttu stutt erindi um starfsemi sína og má þar m.a. nefna verkefni Allra heimsins kvenna og Rauða kross Íslands Félagsvinur – mentor er málið, verkefni Landspítala Háskólasjúkrahúss um starfsaðlögun erlendra hjúkrunarfræðinga og starfsfólks í eldhúsi auk annara kynninga frá Reykjavíkurborg, Alþjóðahúsi, Fjölmenningarsetri og fleirum.
Samstarfshópurinn Allar heimsins konur vinnur að því að styrkja stöðu erlendra kvenna á Íslandi.
17. febrúar 2009
Uppfært rannsóknaryfirlit komið á vefinn
Undir liðnum ÞEKKINGARBANKI hér til vinstri má nú finna nýja uppfærslu á skrá MIRRU yfir rannsóknir og rit um innflytjendamálefni. Allmörg lokaverkefni úr háskólum hafa bæst við auk annarra greina og skýrslna. Athygli er vakin á að hægt er að nálgast vefútgáfur talsvert margra rita út frá þessari skrá, sem ætti að auðvelda fólki að nálgast upplýsingar. Það er markmið MIRRU að fylgjast með og uppfæra efnið stöðugt, en þessi þjónusta hefur mælst vel fyrir hjá þeim sem vinna að málefnum tengdum innfytjendum og íslensku fjölmenningarsamfélagi. Einnig hefur komið í ljós að skráin er mikilvægur upplýsingabanki fyrir háskólanema, sem eru að vinna að námsverkefnum.
17. febrúar 2009
Rannsókn MIRRU fær jafnréttisverðlaun KSÍ
Á ársþingi Knattspyrnusambands Íslands, sem haldið var 14. febrúar s.l. voru í fyrsta sinn veitt sérstök jafnréttisverðlaun. Tvenn verðlaun voru veitt og hlaut knattspyrnudeild ÍR verðlaun fyrir rannsóknarverkefnið “Innan vallar eða utan”. MIRRA gerði rannsóknina og er rannsóknarskýrslan aðgengileg hér á heimasíðunni á .pdf formi. Það er óneitanlega mikil hvatning fyrir skýrsluhöfunda að sjá svona beinan árangur af rannsóknarvinnunni. Fréttatilkynning KSÍ er birt hér fyrir neðan.
Afhending jafnréttisverðlauna á ársþingi KSÍ
Knattspyrnudeild ÍR og Víðir Sigurðsson hlutu jafnréttisverðlaun
14.2.2009
Í fyrsta skiptið voru veitt sérstök jafnréttisverðlaun á ársþingi KSÍ. Í þetta skiptið voru það tveir aðilar eru fengu verðlaunin. Knattspyrnudeild ÍR fyrir verkefni þeirra "Innan vallar sem utan" og Víðir Sigurðsson fyrir skrásetningu um sögu íslenskrar knattspyrnu.
Knattspyrnudeild ÍR hefur lagt mikinn metnað í það að ná til innflytjenda og létu gera rannsókn á þátttöku innflytjenda í íþróttum. Þess má geta að hægt er að nálgast almennar upplýsingar á heimasíðu ÍR á sex tungumálum.
Víðir Sigurðsson, blaðamaður, hefur verið fremstur í flokki í skrásetningu íslenskrar knattspyrnu í mörg ár. Hann hefur jafnan lagt áherslu á að skrifa jafnt og konur og karla á öllum aldri.
Það var formaður KSÍ, Geir Þorsteinsson, sem afhenti viðurkenningarnar.
10. febrúar 2009
Ársskýrsla MIRRA um starfsemina 2008
Skýrsla um starfsemi MIRRA á árinu 2008 er komin út. Skýrsluna má lesa hér.
29. janúar 2009
Útlendingar óttast að verða vísað úr landi
Í Fréttablaðinu í dag er umfjöllun um þá erfiðu stöðu sem fólk frá löndum utan EES-svæðisins lendir í við atvinnumissi. Fram kemur að fólk utan EES eigi ekki rétt á atvinnuleysisbótum hafi það ekki óbundið atvinnuleyfi og margir hafi leitað til Alþjóðahúss með miklar áhyggjur af stöðu sinni. Fréttina má lesa í heild á http://www.visir.is/article/20090129/FRETTIR01/377120672/-1
27. janúar 2009
Úthlutað af fjárlögum til starfsemi MIRRA
Þau gleðilegu tíðindi bárust í bréfi frá Alþingi á dögunum að Fjárlaganefnd hefði úthlutað 6 milljón króna framlagi af fjárlögum til MIRRA. Ljóst er að þessi fjárveiting skiptir sköpum til þess að unnt sé að halda úti grunnstarfsemi stofnunarinnar.
21. janúar 2009
Hagtíðindi - Innflytjendur og einstaklingar með erlendan bakgrunn 1996-2008
Hagstofa Íslands hefur gefið út Hagtíðindi nr. 2009:1, Innflytjendur og einstaklingar með erlendan bakgrunn 1996-2008. Þetta er mjög vönduð og ítarleg skýrsla, en þar er að finna ýmsar fjöldatölur um innflytjendur og fólk af erlendum uppruna, m.a. í samanburði við nágrannalöndin, auk mikilvægra skilgreininga á hugtökum og ítarlegra upplýsinga um gagnagrunn Hagstofunnar. Skýrsluna má nálgast á vef Hagstofunnar, slóðin er http://hagstofan.is/lisalib/getfile.aspx?ItemID=9077 .
8. janúar 2009
Samstarfssamningur milli MIRRA og Rauða kross Íslands um rannsóknarverkefni
Þann 5. janúar skrifuðu Kristján Sturluson, framkvæmdastjóri Rauða kross Íslands og Hallfríður Þórarinsdóttir, forstöðumaður MIRRA, undir samstarfssamning um rannsóknarverkefni. Samkvæmt samningnum tekur MIRRA að sér að kortleggja stöðu og líðan innflytjenda í þeim efnahagslega samdrætti sem nú er á Íslandi. Haldnir verða fundir með innflytjendum víðs vegar um landið þar sem aflað verður upplýsinga um upplifun fólks og leiðir til að takast á við erfiðar aðstæður. Áætlað er að verkefninu verði lokið 10. apríl.
